الحب للجميلات فقط الحلقه الثانيه

سرحت مريم طويلاً في كلام اختها ،، في الحالات الاعتيادية تتعرض الفتاة للكثير من المعاكسات و لكن مريم انتبهت انها لم تسمع اي معاكسات من اي شاب 

نعم جميعنا نقول ان المعاكسات امر مزعج بل هو فعلا مزعج و لكن لا نستطيع الانكار ان احياناً الكلام المعسول من اي شاب حتى ان لم يكن فارس الاحلام يجعلنا نتغير تماماً، يعيد لنا الثقة بأنفسنا ، انها غريزه وضعها الله في المرأة تحب ان تسمع كلمات الغزل او عبارات الاعجاب من الناس 

لم تسمع مريم تلك الكلمات من قبل ، لم يتغزل احد في شكلها او ينظر لها بحب ، بل ان الجميع يعاملها على انها لا تستحق الاعجاب و التقدير 

تحدثت مع نفسها 

يا ترى حييجي اليوم اللي حد يبصلي فيه بعشق زي الافلام كدة و ييجي حد يحبني و احبه و نخرج مع بعض و اوحشو و يوحشني و ابقى حتجنن عشان اشوفو ،، و اتخانق معا و يصالحني،،، ثم ابتسمت بسخرية ياااه الظاهر اني بدأت اخرف من التعب ،، قال حد يحبني قال ،،،،،،،،،

عادت مريم الى منزلها و هي في غاية الفرح، تدور حول والدتها و اختها و تضحك بصوت عالي

اماني،، انت خلاص يا بنتي مخك فوت 

والدتها،، ربنا يفرحك كمان و كمان 

مريم،، مش مصدقة انهم قبلوني في الشغل حاسه اني في حلم

اماني،، امال لو عملوكي المديرة كان حصلك ايه 

مريم،، مش مهم المهم اني لقيت شغل انا فرحانه اوي

اماني،، مبروووك يا ميرو عقبالي يا رب

والدتها،،انا مش فاهمه حاجه هو فين الشغل ده و حتشتغلي ايه

مريم ،، انا حشتغل سكرتيرة يا ماما في عيادة دكتورة اطفال ،، اسمها يارا الحسيني ،، قبلتني على طول في الشغل عشان مستعجلة انها تفتح العيادة بتاعتها 

والدتها ،، ربنا يوفقها و يوفقك يا بنتي بس انت حتبدأي امته
مريم،، بعد بكرا افتتاح العيادة و حبدأ معاها على طول 

اماني،، ربنا يوفقك يا اختي و انا حستجدع معاكي و اعملكو شاي عشان نحتفل 

والدتها،، شاي بس و الله انا مش عارفة حتفتحي بيت ازاي

اماني،، بضحك،، حخلي جوزي يعمل كل حاجه

مريم،، ايوااا عشان يرجعيك لينة في الصباحيه

والدتها،، ربنا يديني عمر و اشوفكو انتو الاتنين متجوزين و متهنين في بيوتكو 

اماني ، مريم،، ربنا يخليكي يا ماما

ادهم عاد الى المنزل مبكراً و كان خالي من الاصوات ،، استغرب الوضع و نادى على الخادمة

ادهم،، امينة،، امينة

امينة،، ايوا يا بيه انا كنت في المطبخ

ادهم،، هو البيت فاضي ليه ،، راحو فين

امينة،، زي كل يوم ، الهانم الكبيرة في النادي، و سي حسام في الجامعة،، و مصطفى بيه لسه مرجعش من الشغل

ادهم،، طب و نادين فين

امينة،، فوق مع الست رندا في اوضتها

ادهم ،، طب انا طالعلهم 

في غرفة رندا كان صوت الموسيقى صاخب و عالي جدا و رندا تضع السماعات في اذنيها و تعبث بهاتفها و تتراقص مع الموسيقى ووضعت جهاز الكومبيوتر على السرير ،،، 
دخل ادهم و لم تشعر به الى ان صرخ بها لتسمع

رندا،، سوري مكنتش سامعاك 

ادهم،، ايه اللي انت بتسمعيه ده و ايه المكياج الكتير ده انت حتخرجي

رندا،، بأنزعاج،، لا انا في البيت مش عايزني ارتاح و انا في اوضتي كمان 

ادهم،، انزعج من قلة تهذيبها ،، فين نادين

رندا ،، راحت اوضتها 

ادهم،،بأنفعال ،، و ازاي تسيبيهه لوحدها

رندا،، يوووه هو انا مامتها يا ادهم عايزني امنعها تروح اوضتها

ادهم بحدة ،، ماشي يا رندا 

خرج من غرفة رندا و هو منزعج من تصرفاتها و قلة تهذيبها و شعر انها لا تهتم بأبنته كما كان يعتقد

دخل الى غرفة نادين فوجدها تعبث بألعابها بملل

ادهم ،، ايه يا حبيبتي ليه سبتي طنط رندا و قاعده لوحدك
نادين بملل،، عشان الميوزك عاليه اووي و هي مش بترد عليا
ادهم، بحزن،، معلش انا اسف عشان سايبك بس انت عارفة ان بابي بيحبك و لازم يشتغل صح

نادين،، بس انا بخاف لوحدي 

ادهم،، انا عارف ،، بس انا مش عايزك تخافي،، ايه رأيك احكيلك حكاية

نادين بفرح،، بجد ،، ماشي بس تعالى نام جانبي يا بابي

ادهم،، حاضر يا قلب بابي 

و احتضنها ادهم و بدأ يقص عليها حكايه حتى نامت في احضانه، ثم تركها لتنام بهدوء و نزل للطابق الاسفل

ادهم،، امينة ،، اعمليلي قهوة و هاتيلي حاجه للصداع

امينة ،، حاضر

جلس في حديقة المنزل يتصفح المواقع على اللاب توب و يشرب القهوة حتى رن هاتفه،، و ظهر اسم يارا على الشاشة

ادهم،، ايوا يا يارا 

يارا،، ازيك يا باشمهندس 

ادهم ،، الحمد الله 

يارا ،، انا زعلانة منك اوووي ازاي من ساعة ما تقابلنة متفكرش تزورني ولا مره 

ادهم،، انا اسف حقك عليه بس يادوب ملاحق بين الشغل و نادين

يارا،، اااه انا نسيت انك بقيت اب و عندك بنت لازم تخلي بالك منها، بس ايه رأيك تجيبها عشان تطمن على صحتها و اتعرف عليها بالمرة

ادهم،، اكيد طبعا بس انت بتشتغلي فين

يارا،، بص بقة افتتاح عيادتي بعد بكرا و عاملة الكشف مجاني اول يوم عشان متقولش عايزه ادبسك 

ادهم،،، ههههه بجد الف مبروك اكيد حجيلك انا ونادين 

يارا،، تنوروني و انا بعتلك العنوان في رساله

ادهم،، شكرا يا يارا ،، اشوفك بعد بكرا،، مع السلامة

يارا ، بدلع،، باي باي 

في يوم افتتاح العيادة ذهبت مريم مبكراً الى عملها الجديد و كانت متحمسه جدا

يارا ،، ده مكتبك و حتلاقي على الكومبيوتر كل المواعيد بتاعت النهارده،، حتعرفي تطلعيهم من الجهاز و لا حتتعبيني

مريم ،، بأرتباك،، لا انا بعرف اشتغل على الكومبيوتر

يارا،، على فكره استراحة الغدا ربع ساعه بس و اياكي تتأخري عشان انا بخصم على التأخير لأي سبب

مريم،، لا ان شاء الله مش حتأخر و اجي في معادي بالضبط

يارا،، متنسيش تفهمي العيانين ان الكشف مجاني النهارده بس مش كل يوم ،، انا مش فتحاها سبيل

مريم بضيق،، حاضر

يارا،، و في واحد حييجي اسمه ادهم حسان ده تدخليه على طول فاهمة اوعي تخليه يستنى

مريم ،، حاضر تحت امرك

يارا،، اما نشوف شغلك 

تركت يارا المكان و هي تصدر ذلك الصوت المزعج القادم من كعب حذائها العالي و تمشي بتفاخر و كأنها اميرة الكون 

قالت مريم في نفسها،، دي شكلها حتطلع عيني ،، هي اصلا مش حباني خالص و بتبصلي من فوق لتحت ،، يارب حنن قلبها عليه انا محتاجه الشغل ده اوي ،،،

بدأت مريم بأدخال البيانات في الكومبيوتر و ادخال المرضى حسب الدور و الاجابه على الهاتف من الحين للآخر ،، 

في منتصف النهار دخل ادهم مع ابنته لعيادة يارا و ذهب الى مريم التي كانت مشغوله ببعض الاوراق 

ادهم ،، لو سمحتي يا انسه انا عندي معاد 

رفعت مريم رأسها لتفاجأ بوجه ذلك المغرور ينظر اليها

مريم بعفويه ،، انت !!!

ادهم بعدم تركيز ،، نعم؟؟؟

مريم ،، بأرتباك شديد،، مش حضرتك كنت معايا في الطياره

و قبل ان يرد ادهم انطلقت نادين و احتضنت مريم،،

نادين،، ايوا انا فكراكي بس انت مش جيتي تشوفيني

مريم بخجل ،، انا معرفش عنوانك يا نادين 

ادهم،، افتكرت انت اللي كنتي بتتكلمي كتير في الطياره

مريم خجلت جدا من تعليقه السخيف و نظرت له بحقد ثم تجاهلته و تكلمت مع نادين

مريم،، انت كويسه يا نادين ،، ليه جيتي للدكتوره

نادين ببراءة ،، انا مش عيانه انا جيت اشوف صاحبة بابي 

ادهم ،، اي صاحبة بابي دي اسمهه زميله بابي عيب كده 
ثم استدار على مريم،، ممكن ندخل 

مريم بحنق ،، حاضر لما ييجي دوركو

ادهم ،، انا مقدرش استنه معنديش وقت اضيعه 

مريم،، والله انا اسفه حضرتك لازم تستنى دورك 

ادهم،، امري لله حستنى لحد امته 

مريم،، العياده زحمة النهارده يعني حتستنى ييجي ساعتين تقريبا

ادهم ،، بغضب ،، ماشي يلا يا نودي

نادين،، لا انا عايزه استنة مع مريم

ادهم ،، لا مفيش داعي تعطليها

مريم،، لا خالص انا عايزه اقعد معاها كمان 

كان ادهم يجلس بالقرب من مكتب مريم و يراقبها بخلسه ، كانت تضحك مع نادين من كل قلبها و تطعمها الشوكولاته و ترسم معها بعض اللوحات الصغيرة ، منظرها ذكره بمعامله شيرين لنادين و اهمالها في حق ابنتها ثم ابتسم رغماً عنه عندما شاهدها تأكل الشوكولاته كالاطفال و تطعم نادين برقة ،،،،

كم كانت مريم مختلفة عن الفتيات في عالمه ،، فتاة بسيطه ، عفويه ، حنونة ،، لا ترتدي احدث صيحات الموضه و لا تتزين بالمكياج الكثير ،،لكنها تدخل القلب بسرعة شعر انها من عالم اخر ، شرد في تصرفاتها و حركاتها و حنانها على ابنته التي لا تعرفها في الوقت التي كانت رندا لا تحتمل رعايتها لعدة ساعات في اليوم .......

مريم هي الاخرى كانت تراقبه بخلسة ، شعرت بشئ غريب يشدها لذلك المغرور ، صوته ، شكله ، طريقة كلامه و جلسته الهادئه ،، شعرت بأن قلبها يدق بسرعه عندما يقترب منها او يكلمها ، حاولت ان تطرد تلك الافكار من رأسها و لكنها لم تستطيع ان تمنع نفسها من النظر اليه 

ثم ظهرت يارا امامها فجأه و علامات العصبيه و الغضب تكسو وجهها

يارا،، انت يا اللي اسمك مريم ،، سايبة شغلك و قاعدة تلعبي مع العيال !!!!

يارا،، انت ياللي اسمك مريم ،، سايبه شغلك و قاعده تلعبي مع العيال

مريم بأرتباك،، لا والله انا بعمل شغلي كلو بس البنت دي انا اعرفها اصلا و حبت تقعد معايا 

يارا،، ده اول يوم شغل و بتعملي كده امال لو كنتي عندي من زمان كنتي عملتي ايه

مريم بضيق،، انا اسفة يا دكتورة

يارا بحدة ،، هو ادهم لسه مجاش؟؟ 

ثم اتى ادهم بجانبها ،، انا هنا من ساعة و نص بس حضرتك اللي مشغوله و عامله علينا دكتوره 

يارا قبلته بسرعه ،، استنيت ليه بس انا قلت للسكرتيرة تدخلك على طول

ادهم بأحراج ،، معلش اصل المرضى كتير

التفتت يارا الى مريم بعصبية ،، انا مش قلت ادهم يدخل على طول

مريم،، انا اسفة اصله خد معاد بأسم بنته ،، انا معرفش ان حضرتك استاذ ادهم 

يارا،، دي تاني غلطة في نفس اليوم ،، البدايه كده متطمنش
ثم التفتت الى ادهم ،، اسفه على التأخير بجد

ادهم،، مش مهم ،، يلا مش حتكشفي على نادين

يارا بأبتسامة،، انت نادين كان نفسي اتعرف عليكي من زمان

نادين نظرت اليها بخوف من عصبيتها مع مريم 

يارا بأرتباك ،، اتفضلو 

دخل ادهم مع نادين غرفة الكشف ، و ذهبت معه يارا وهي تنظر لمريم بتوعد 
.
.
.
يارا،، نادين صحتهه كويسه جدا 

ادهم ،، طب الحمد الله 

يارا،، شعرك حلو اوي يا نادين

نادين بضيق،، شكرا

يارا،، يا ترى انت بتحبي تلعبي بالباربي و له بحجات تانيه

نادين ،، مش بحب العب بالباربي 

يارا بأحراج ،، طيب تحبي نلعب مع بعض 

نادين،، بابي انا عايزة اروح لمريم 

ادهم،، مينفعش عشان هي بتشتغل دلوقتي 

ولكن يارا كانت تتمنى ان تخرج نادين من الغرفة 

يارا،، مش مشكله لو عايزه تلعبي معاها ممكن اسمحلها تاخد بريك

ادهم،، متأكده انت لسه كنتي عايزاها تركز في الشغل 

يارا،، لا خالص هي بس شكلها مبتفهمش في شغل السكرتارية كويس

ادهم ،، خلاص روحي عندهه بس متتحركيش من عندها لحد ما ارجعلك

نادين بفرحة ،، اوكي ،، و ذهبت بسرعة البرق الى مريم 

ادهم،، معلش متزعليش من نادين هي بس حالتها النفسيه متلخبطه

يارا،، لا طبعا مش زعلانة،، بس انا ممكن اسألك سؤال

ادهم،، اتفضلي

يارا،، انا مش قصدي اتدخل بس احنا صحاب من زمان، و بصراحة انا استغربت لما طلقت شيرين

ادهم بصوت مخنوق،، انا اكتشفت فجأه اني خسرت كل حاجه ، بيتي و مراتي و شغلي و حتى بنتي كنت حخسرها 

يارا،، مش فاهمة ،، بس انت كنت بتحبها ايه اللي حصل 

تنفس ادهم بحسرة و اشعل سيجارة جديدة ووضعها في فمه بتوتر 

ادهم،، حبي ليها عذبني اوي انا تعبت اوي يا يارا حاسس ان دماغي حتنفجر من التفكير مش قادر اشيلها من دماغي 

يارا بحزن،، انت لسه بتحبها 

ادهم بأنفعال ضرب الطاوله بيده ، مش عارف ،، و مش فاهم ، كل حاجه اتلخبطت مش فاااهم و لا قادر افكر

يارا،، خلاص انا مش حضغط عليك بس ارجوك اهدى مفيش داعي تعمل فنفسك كده 

ادهم،، بتوتر،، انا اسف اتعصبت عليكي ، خلاص انسي الموضوع

يارا ،، المهم انت اللي تنسى

ادهم بضيق ،، ياريت اقدر اعمل كده كنت ارتحت 

يارا،، على الاقل نادين معاك

ادهم،، ايوا ، انا لما ببص في وشها بنسى الدنيا

يارا بضيق،، ربنا يخليهالك

ادهم،، اه صحيح انا كان عندي طلب سخيف شويه 

يارا،، انت تأمر يا ادهم 

ادهم،، بما ان السكرتيره بتاعتك دي مش عارفة تشتغل شغل العياده ايه رأيك اشوفلك انا وحده عندهه خبرة و اخد انا دي عندي

يارا بدهشه ،، مش فاهمة تاخدهه عندك في الشركة

ادهم،، لا طبعا ،، انا عايزهه بيبي سيتر لنادين ، انت عارفة انا طول الوقت في الشغل و نادين محتاجه حد يقعد معاها و انا مش فاضي الايام دي

يارا بسخرية، دي حتعرف تقعد مع نادين؟؟؟ 

ادهم،، شكلها بتعرف تتعامل مع الاطفال و نادين بتحبها و انا عايز نفسيتها تتحسن 

يارا بعدم اقتناع،، مش عارفة يا ادهم 

ادهم،، انا حجرب و لو منفعتش خلاص اجيب غيرها و اوعدك بعد بكرا يبقى عندك سكيرتيره جديده

يارا،، خلاص براحتك

ادهم،، متشكر انت مش متخيله الموضوع ده اكيد حيفرق مع نادين ، انا عايزها ترجع زي زمان 

يارا بأنزعاج،، اااه و انا كمان
.
.
.
نادت يارا على مريم لتتحدث معها في المكتب 

مريم،، ايوا يا دكتوره 

يارا بأنزعاج ،، الاستاذ ادهم عايز يعرض عليكي شغل 

مريم بأرتباك،، بس انا بشتغل 

ادهم رفع رأسه ببطأ ليتحدث معها و هو يشرب القهوة 

ادهم،، انا عايزك تبقي بيبي سيتر لنادين بنتي و حديكي ضعف المرتب بتاعك هنا 

تفاجأت مريم بعرضه و لم تعرف كيف ترد ، لم تعرف لماذا كانت متوتره لوجودها معه او حتى النظر الى عينيه 

يارا،، انت حتفضلي ساكته كتير 

مريم بتوتر،، بس انا معرفش يعني اقصد انا مشتغلتش مع اطفال قبل كده

ادهم،، انسه ،، اسمك ايه ؟؟ 

مريم بأنزعاج ،، اسمي مريم

ادهم ،، انا شايف ان نادين مرتاحه معاكي و ده اللي بيهمني

مريم،، بس شغلي هنا ازاي ،،، 

ادهم،، انا اتفقت مع الدكتوره على كل حاجه ، موافقه و لا اشوف غيرك

طريقة كلامه كانت مستفزة و يتحدث بلهجة غرور زعجت مريم ، و لكنها تذكرت معاناتها مع رحلة البحث عن عمل و لكنها الان امام خيار صعب ،، اذا وافقت على العمل سيتضاعف راتبها و تستطيع مساعدة والدتها و ايضا ستكون بجانب نادين الطفله التي احبتها من اللحظه الاولى ، لكن كيف تتعامل مع ذلك المغرور ،، و اذا رفضت العرض ستطردها يارا من العمل بكل الاحوال
كانت الافكار تدور في رأسها و لاتعلم كيف تقبل او ترفض هذا العمل و لكن ادهم قطع شرودها 

ادهم،، على فكره انا عندي شغل مش حستنى اليوم كلو 

مريم بتوتر،، خلاص انا موافقة

ادهم بأرتياح،، كويس ،، ده عنوان البيت تيجيني بكرا الساعة تسعة بالدقيقة تكوني عندي 

مريم ،، و حمشي الساعه كام

ادهم،، لما انا ارجع من الشغل تبقي تمشي،، و بكرا ابقى اشرحلك تعملي ايه 

مريم بتوتر ،،، حاضر

ادهم سحب الجاكيت من الكرسي المجاور بهدوء ،، انا لازم امشي دلوقتي اتأخرت على الشغل 

يارا،، اوكي بس عشان خاطري متفكرش كتير و خلي بالك من نفسك

ادهم،، ابتسم بهدوء ليارا،، متقلقيش 

استغربت مريم من اخر جمله قالتها يارا لأدهم و لكنها كانت سعيده نوعاً ما انها لن تضطر للانصياع لأوامرها و عجرفتها يوماً اخر،،،،،، و لكنها لا تدري ماذا ينتظرها في منزل ادهم ،،،،،

قصت مريم كل ما حدث على والدتها و اختها و اعجبتهم الفكره لأنها بالطبع لم تخبرهم عن طريقه تعامل ادهم السيئه معها ،،،،،

اما في منزل ادهم زعج هذا الخبر والدة ادهم 

نهلة،، و لازمتها ايه تجيبلها مربيه و احنا كلنا في البيت

ادهم،، لا انتو على طول بره البيت و البنت محتاجه حد معاها على طول 

نهلة،، يعني منتحركش من البيت يا ادهم ، دي لسه عيله صغيره و بكره تتعود

ادهم،، انا ما طلبتش منكو توقفو حياتكو عشانها بس انا مش عايز بنتي تقعد لوحدها و ده حل مناسب للكل

رندا،، ايوا يا ماما بصراحه نادين صعب التعامل معاها و انا مش بعرف هي عايزه ايه

ادهم،، مش لما تسأليها و له تقعدي معاها 

رندا،، قصدك ايه ان انا مش بهتم بيها

ادهم،، مقصديش خلاص من بكرا مش حيبقى فيه مشكله،، هو حسام فين؟؟

رندا بأنزعاج،، بيذاكر في اوضتو

ادهم،، و انت مش حتذاكري و له ناويه تسقطي السنه دي كمان 

رندا،، لعلمك انا بذاكر اكتر من حسام بس انت اللي بتكون في الشغل و متشوفنيش

ادهم،، كلو حيبان اخر السنة 

نهلة ،، سيبك من اختك و قلي انت اتصلت بمراتك 

ادهم تغيرت ملامح وجهه ،، مش حتصل يا ماما و ارجوكي بلاش كل شويه تسأليني عشان انا مش حتصل بيها خالص !!!!!

نهلة،، لو اعرف بس عملتلك ايه يا بني انا مامتك و محدش بيخاف عليك ادي

ادهم قبل يديها،، ربنا يخليكي لية بس صدقيني انا مرتاح من غيرها بلاش تدخليها حياتي تاني عشان المره دي مش حستحمل 

نهلة بحزن على حاله ،، خلاص يا حبيبي انا عايزه اشوفك مرتاح و مش عايزه حاجه تاني من الدنيا 

ادهم،، و انا مرتاح كده ،، انا طالع لحسام ،، عن اذنكو

دخل ادهم الى غرفة اخيه بهدوء ليجده منهمك في الدراسه 

ادهم،، قاعد انت هنا و سايب ماما و رندا ياكلو دماغي 

حسام،، بذاكر انا عايز اخلص الماده دي قبل الامتحان و في حجات مش فاهمها كمان 

ادهم،، طب يا سيدي ربنا يوفقك ،، اسيبك انا تذاكر براحتك
حسام،، هو ايه اللي وره ظهرك ده ،، انت مخبي ايه

ادهم بخبث،، هههههههههههه و انت مالك
حسام،، كده ماااشي 

حسام قفز من مقعده و هو يحاول ان يقتلع الصندوق من يد ادهم و هو يضحك اما ادهم فكان يقوامه بشراسه ،،و يضحك من كل قلبه،، و قد تكون هذه الضحكه الاولى التي ترتسم على وجه ادهم منذ ذلك اليوم في لندن،،، و اثناء ذلك الصراع على الصندوق ركل حسام اخاه على بطنه ركله خفيفه و لكن رد فعل ادهم كان مفاجئه صاعقه لحسام جعلت عيناه تتسع بصدمة و هو يحاول تقبل ما يحصل ،،،،،،،، تمشي الرياح بما لا تشتهي السفن

دار بين ادهم و حسام صراع مضحك على ذلك الصندوق الذي يخبئه ادهم وراء ظهره و لأن ادهم كان قوي البنيه حاول حسام ان يركله ليقتلع الصندوق من يده و رغم انه لم يركله بقوة الا ان ادهم صرخ بتألم 

ادهم،، تحرك بألم ،، ااااااه ،، ااه بس يا حسام و حاول ابعاده 

حسام،بضحك،، انت حتمثل عليه هات الصندوق اللي وراك ،، هاتو يا ادهم و الا حاخدو بطريقتي ،، كدده طب خد ،، كان حسام يمزح مع اخيه فبدأ بركله بقوه اكثر و مرات متتاليه و قد بدأ ادهم يستسلم 

و فجأه سقط الصندوق من يد ادهم و التقطه حسام بفرحة ثم بدأ بفتحه و هو يسخر من اخيه

حسام،، اما نشوف مخبي ايه ،، قلتلك انا حجيبو عشان تعرف اني اجمد منك 

ادهم، .................

فتح الصندوق بحماس ووجد فيه لاب توب جديد و عليه بطاقة ورقيه مكتوب فيها،،
{ مبروووك عليك يا اجدع محامي فمصر }

حسام بفرحة و ابتسامة،، مش معقووول ده اللاب توب اللي كنت عايزو بالضبط انا مش مصدق انك جبته ،، ده انت اللي اجدع اخ في الدنيا 

رفع حسام رأسه ليشكر ادهم و لكنه تفاجأ عندما وجده جالس على الارض و يضع يده على بطنه بألم ،، يعض على شفتيه بقووة و يتلوى في مكانه من الالم

حسام،، بصدمة،، ادددهم مالك انت كويس 

ادهم لم يستطيع الاجابة و اكتفى بان يغمض عينيه بقوة و هو يتنفس بسرعه 

حسام ،، اقترب منه غير مصدق ،، انت بتعمل عليه فلم يا ادهم صح، خلاص بطل تمثيل انت عارف اني بقلق عليك بجد حتى لو بتمثل 

ادهم،، مد يديه الى حسام و قال بصعوبه،، قومني يا حسام

حسام بحيره ، لم يكن يعلم اذا كان ادهم جاد فيما يقول او انه يحاول اثاره شفقته و لكنه ساعده على القيام من الارض و فور قيامه انتبه حسام ان يد ادهم تلطخت بالدماء التي لوثت قميصه الابيض 

حسام بصدمة،، ايه ده !!! ايه الدم ده يا ادهم انت اتعورت ،، انا اللي عورتك صح ،، بس ازاي ادهم رد عليه انت كويس

ادهم بصعوبه ،، اهدى انا كويس 

حسام،، كويس ايه ،، الدم ده جاي منين ابعد ايدك وريني 

ادهم،، بالراحة يا حسام 

حسام، بخوف،، حاضر بس ابعد ايدك دي 

ادهم ،، خلاص مفيش داعي ده جرح بسيط

حسام بقلق ابعد يد ادهم بقوه عن بطنه ثم فتح ازرار قميصه و كانت صدمته لا توصف عندما رأى جرح كبير جدا في بطن ادهم و الدم يتساقط منه،، اتسعت عينيه 

حسام،بحيره،،، ايييه ده ؟؟؟ انت عامل عمليه ؟؟؟ 

ادهم،، حاول ان يخفي المه و يتمالك نفسه،، ايوا ده جرح العمليه ،، متقلقش عليه بس هاتلي قطن او اي حاجه اوقف الدم بيهه 

حسام ،، اي حاجة ايه قوم معايا بسرعه ،، ازاي سبتني اخبطك على مكان العمليه ، انا السبب ،، يلا خلينا نروح المستشفى 

ادهم،، لا مفيش داعي شويه و حبقى كويس 

حسام،، انت بتهزر ، مستحيل اسيبك كده و بعدين انت حتى تنفسك مش مضبوط ارجوك عشان خاطري لازم نروح المستشفى

استسلم ادهم لطلب حسام لأنه هو ايضا شعر بوخز في مكان الجرح و الم مضاعف

في المستشفى جلس حسام في قاعة الانتظار يلوم نفسه 
و يتذكر كيف كان يركل ادهم بقوة ثم خرج الطبيب من غرفة الفحص

حسام بلهفة،، طمني يا دكتور 

الدكتور ،، للأسف الغرز اتفكت و لازم نعيد الخياطه

حسام،، يعني هو حيبقى كويس ،، ممكن اشوفو

الدكتور ،، ان شاء الله ،، متقلقش هو الظاهر لما اتخبط على نفس المكان اكتر من مره الغرز اتفكت و ده اللي سبب النزيف و كمان الجرح ملتهب جدا و كان لازم ياخد مضاد حيوي بس هو كيد مش ملتزم بالدوه 

حسام،، بحزن،، انا كمان لاحظت ان تنفسه مكانش مضبوط

الدكتور،، لا ده من الربو و بقه كويس متقلقش،، انا حدخله دلوقتي عشان نعيد الخياطه و ممكن تشوفو لما يخرج

حسام ،، شكرا يا دكتور
.
.
.
كان قلق جدا على ادهم و يشعر بالذنب و هو يراقب اي ممرضه او طبيب يمرون امامه لعلهم يطمئنوه على اخيه ثم رن هاتفه فرد بتوتر

حسام ،، ايوا يا ماما

نهلة،، انتو فين رندا بتقول انك خرجت مع اخوك و كان شكله تعبان و متسند عليك ،، هو كويس طمني

حسام بتردد،، متقلقوش هو كويس بس عندو دور برد جامد و انا خدتو على المستشفى 

نهلة،، متأكد انه كويس ، انا صوتك مش عاجبني اوعى تكون مخبي حاجه 

حسام بتوتر،، لا حخبي ايه بس

نهلة،، طب اديهوني اكلمه 

حسام،، مينفعش اصله خد دوا و نايم

نهلة ،، طب حترجعو امته و له اقلك انا جيالكو 

حسام،، لا يا ماما احنا مش حنتاخر الحكايه مش مستاهله متقلقيش

نهلة ،، بس اول لما يصحى تخلي يكلمني عايزه اتطمن عليه و كمان نادين عايزه تكلمو و مش راضيه تنام

حسام،، حاضر اول ما يصحى هخليه يكلمكو ، انا لازم اقفل دلوقتي

نهلة،، ماشي بس اوعى تنسى تطمني انا قاعده على نار
اذا اعجبتكم الروايه الرجاء ترك تعليق
اي ملاحظات الرجاء ترك تعليق
الرجاء التعليق كي نستمر في نشر أفضل وأجمل القصص والروايات
لنشر الجزء الثاني علق على المنشور بالموافقه